Adriano Cavallo/Còs ch'i sarìo mi

Artorn

---

Cos ch'i sarìo mi?

Dedicà a mia fomna

Còs ch’i sarìo mi, sensa toa presensa,
còs ch’i farìo mi, sensa tò savi consèj?
Am dà sicurëssa toa avzinansa,
t’im fas sente alégher coma j’osej.

I sai pa coma ch’it fase a avèj sti don,
da onda it l’has pijalo sto s-cèt amor?
Òh che ’d vòlte ch’i son rusiame l’ànima,
për capì da onda ch’a ven toa dossëssa.

Sarà la còla ’d vita ch’it l’has avù,
temprà dai magon, lerme e umiliassion.
Ma i son sicur che coma ti t’i-i ses mach ti,
cadò pì pressios ch’a l’ha dame Nosgnor.

Am basta avèjte sempe dë ’dnans a mi,
podèj ëspeceme ’nt ij tò euj sincer,
scruté giù ’n creus, la sorgiss dij tò sentiment,
mach da lì i peuss capì, còs ch’it ses ti për mi.